St. Magdalenen-Kark Unnel

Ut de Geschicht

9. Johrhunnert
De Franken hebbt de Sassen ut düsse Gegend överwunnen (Sassenkriegen vun Korl den Groten) un maakt ehr to Christen. Üm 800 grünnt Korl de Grote dat Bisdom Veern (Verden) mit en Reeg grote Karkspelen. Unnel höört dat grote Karkspeel Solthusen (Salzhausen) to.

Kort vör 1188
Unnel warrt dat eerste Mal nöömt in en Oorkunn ahn Datum vun den Veerner (Verdener) Arkbischop Tammo (1188) för dat Stift Bewiek (Bardowiek).

Üm 1200
De Kark warrt ut grote Feldsteen boot.

1244
De Kark warrt dat eerste Mal in en Oorkunn nöömt, un dat as sölvststännige Parrkark ("ecclesia") in en Oorkunn vun den Veerner (Verdener) Bischop.

1371
Dat kümmt to enen parramtlichen Verbund mit de Parrgemeen Hanstääd (Hanstedt) (bet 1956), de Sitt is in Hanstääd.

Twüschen 1527 un 1530
De Kark warrt evangeelsch.

1641 - 1644
An de Stell vun den wölvten Chorruum (Altorflach), de 1639 instört is, warrt en Fachwarkbo opricht un mit Tegelsteen utfüllt. De Kanzel, de dor nu noch is, warrt köfft.

1647
En School warrt in Unnel grünnt.

1654 - 1656
An de Kark warrt wieder boot.

Üm 1890
De Plaan, de ole Kark aftorieten un en ne'e to boon, warrt fallen laten.

1891
De Kark warrt renoveert. De Finstern in den olen Deel vun de Kark warrt op neegootsche Oort grötter maakt.

1929
As man dat grote Kruzifix un den Altoropbo restaureert un wedder anbröcht hett, warrt de Kark nee inwieht.

1956
Unnel warrt (wedder) sölvststännige Karkengemeen un Parrsitt (vörher höör se to dat Parramt Hanstää (Hanstedt)). Dat Schoolhuus bi de Kark warrt Parr- un Gemeensitt.

1960
As de Kark gründlich renoveert is, wieht man ehr nee in.

Utstafferen

Altoropsatz
He warrt 1656/57 för düsse Kark maakt, de Snittjer is unbekannt. De Biller sünd ut de Paschoon Jesu, he is kröönt vun sien Opstahn ut den Dood. Dat is maalt na de Stichen vun Matthäus d. Ö. (1627). De Opsatz warrt 1929 un 1985 restaureert. Vun 1901 bet 1929 hett man em as "weertlos" ut de Kark nahmen un op enen Dackböhn lagert.

Kruzifixus
Wo dat herkümmt un wann dat maakt worrn is, weet nüms. Wohrscheinlich stammt dat ut dat 13. or 14. Johrhunnert. Villicht is dat en Kopie vun en öller Wark.
De Maakoort lett an de ottoonschen un fröhromantschen Kruzifixen ut dat 10. un 11. Johrhunnert denken. Man de Oort vun dat Lennendook wiest in de gootsche Tiet na 1200.

Kanzel
Se warrt 1644 boot. De Kanzeldeckel is vun 1656/57. De Duuv warrt nee maakt.

Holtfigur
Wohrschienlich is se en Torso vun den Erzengel Michael as Drakenmöörder. He driggt en Diakonen-Amtsdracht. Resten vun de Bemalen sünd to sehn. Wann se maakt worrn is un wo se herkümmt, weet keen.

Glasmaleree
Dat Finster achter de Kanzel wiest Jesus as goden Harder. De Maleree is vun 1901 or 1902. Man hett ehr toeerst (bet 1929) as Altorbild in't oosten Finster achter den Altor bruukt. Se is na de Jöögdoort maakt.

Orgel
Klaus Becker, Koppermöhl, boot ehr 1961. Se hett 11 Registers, 2 Manualen un Pedaltastatur.

Dööpsteen
He warrt 1957 in den Steenhauerbedrief Homann in Ollsen maakt.

Klockentoorn
De Bootiet is unbekannt (17. Johrhunnert?). Toletzt warrt he 1992 renoveert. De Klocken sünd vun 1490, 1508 un 1974. Dat Klockenwark för de Tiet is vun 1920 , hett enen Stunnen- un Halfstunnenslag un enen Beedklockenanslag för dat Vadderunser üm Klock 7, 12 un 6. För dat Meddagslüden üm Klock 12 sleit de grote Klock vun 1974.

Karkhoff
He leeg üm de Kark un is siet rund 20 Johr slaten (keen ne'e Graffstellen mehr). Enen ne'en Karkhoff, den de Kommüün inricht hett, is an de Kant vun't Dörp an de Heimbeuker Straat.

Sünst noch wat
En bemaalt Sakramentschapp in gootsche Oort un ut Holt warrt 1902 an dat Kestner-Museum in Hannover verköfft.

Rutgever: Karkengemeen Unnel, Wilser Str. 2, 21274 Unnel, Tel (04189) 282, Februormaand 1997, översett vun H.Thies 2006